Skånevik Vassverk SA

Skånevik Vassverk SA er eit samvirkeføretak som drifter og leverer vatn i Skånevik. Vassverket strekker seg frå Campingen i vest til Nes i aust. Føretaket vart skipa i 1947.

Eigarar av fast eigedom som er registrert i folkeregisteret med fast bustadsadresse, selskap og kommunar i føretaket sitt forsyningsområde som er tilkobla vassverket sitt fordelingsnett, er medlemmer av laget. Eigarar av fritidshus er ikkje medlemer av laget, og har ikkje stemmerett på årsmøtet. Årsmøtet i vassverket velger eit styre på fem personar med leiar og kasserar. Det er deltidsansatt driftspersonell som drifter renseanlegget og ledningsnett.

Kontakt informasjon:

Skånevik Vassverk

Postboks 107

5594 Skånevik

Epost: post@skånevikvassverk.no

Telefon kvardagar mellom kl 9 og 16.

Tlf. 56 123 085 (telefonsentral med vidarekobling)

Tast 1 for spørsmål om tilkobling, avmelding eller faktura.

Tast 2 for spørsmål om vatnkvalitet og tekniske problem

Tast 3 for andre spørsmål og snakka med leiar.

Årsavgifta for vatn blir vanlegvis sendt ut i midten av mars. For tida er årsavgifta på vatn kr 3720 inkl. MVA for eit vanleg hus. Hus med utleigeeiningar betaler ½ vassavgift ekstra pr utleigeeining. For bedrifter og større vassforbrukarar er det eigne avtalar.

=============================================================

Vedtekter for Skånevik Vassverk SA

(Vedtatt i ekstraordinær generalforsamling den 12.12.2012, med endringer av 29.05.2013)

§1 Føretaket

Namnet på føretaket er Skånevik Vassverk SA (org.nr. 954767493). Føretaket er eit allmennyttig samvirkeføretak etablert i samsvar med lov om samvirkeføretak av 29. juni 2007 nr.81. Føretaket har vekslande medlemstal, vekslande kapital og avgrensa ansvar. Medlemer heftar berre med sitt medlemsinnskot for lagets skyldnader. Laget sitt forretningskontor ligg i Skånevik i Etne Kommune.

§2 Føremål
Skånevik Vassverk SA sitt føremål er å syta for vassforsyning til medlemene. Føretaket kan også ved avtale yta vassforsyning til andre enn medlemer innanfor forsyningsområdet på same leveringsvilkår og pris som for medlemer. Vassforsyninga må følgja dei til kvar tid gjeldande krava i drikkevassforskrifta. Skånevik Vassverk SA vert drive etter nonprofitt-prinsippet der allmennyttige føremål ligg til grunn.

§3 Medlemskap
Alle fysiske og juridiske personar registrert med fast eigedom innanfor forsyningsområdet og som har fast bustad- eller firmaadresse i Skånevik, registrert med det i Folkeregisteret/ Einingsregisteret som ynskjer å verta medlem (andelseigar), kan sende skriftleg søknad om medlemskap til styret. Dette inneber at fritidseigedom ikkje kan tena som grunnlag for medlemskap.
Dersom medlemen med fast adresse som nemnde i første ledd er ein juridisk person eller ei samanslutning av fysiske personar (t.d sameige), har denne rett til å søkje medlemskap med fulle medlemsrettar også om fysisk person som er deltakar eller eigar i nemnde eining har personleg medlemskap knytt til annan eigedom.

Styret avgjer innan to månader om søkjaren kan godkjennast som medlem og på kva for vilkår. Medlemskap kan nektast m.a. dersom tilknytning påfører Skånevik Vassverk urimeleg store utgifter.
Medlemskapen kjem ikkje i kraft før tilknytning av eigedomen til forsyningsnettet har skjedd. Medlemene er ved innbetaling av andelskapital og gebyr til Skånevik Vassverk SA bunden av dei til ei kvar tid gjeldande vedtekter og vedtak som vert fatta av årsmøtet og styret.
Medlemen kan ikkje krevje refusjon av heile eller del av betalt vassavgift, eller anna erstatning på grunn av svikt i vassleveransene.

§4 Medlemsinnskot
Medlemene er andelseigarar i føretaket og har dei rettar og plikter som følgjer av vedtektene. Alle som ynskjer å verta ny medlem / andelseigar, pliktar å teikna medlemskap med spesifiserte andelar à kr 400 lydande på namn og eigedom/eining. Andelen er medrekna i tilknytningsavgifta for medlemer. Andelen følgjer eigedomen/eininga, og kan ikkje pantsetjast eller takast utlegg i, eller omsetjast utan saman med eigedomen. Medlemsinnskotet gir ikkje renter, og det vert ikkje utbetalt utbytte. Medlemsinnskotet skal godskrivast føretaket sin eigenkapital. Elles vert eigenkapitalen danna ved godskriving av årsoverskot.

§5 Tilknytningsavgift
Eingongs tilkytningsavgift skal innbetalast ved tilknytning av ny bustad eller anna eining til vassverket sitt leidningsnett. Fysiske eller juridiske personar om ikkje er medlem eller ikkje oppfyller vilkåra for medlemskap, skal svara same tilknytningsavgift som medlemer. Storleiken på tilknytingsavgifta vert fastsett av årsmøtet etter framlegg frå styret. Tilknytingsavgifta skal avgjerast med utgangspunkt i gjenomsnittleg kostnad for vassverket basert på erfaring. Medlemen må sjølv kosta stikkleidning frå hovudleidningens koplingskum. Tilknytingsavgifta skal betalast forskotsvis før vassverket set i gang tiltaket. Eigar av ny bustad eller anna eining, som oppfyller vilkåra for medlemskap, må søkja om og teikna medlemskap og verta medlem i vassverket. Medlem som går ut av laget vil ikkje få tilbakebetalt sin andel eller tilknytningsavgift fra Skånevik Vassverk SA.

§6 Vassavgift
Årleg vassavgift til dekking av vassverket sine utgifter vert fastsett av årsmøtet etter framlegg frå styret. For kvar medlem og eigedom skal det førast register over type eigedom (einebustad/bueining i fleirbustadbygning/ næringseigedom). Standard vassavgift skal fastsetjast for einebustad/ bueining i fleirbustadbygning/ næringseigedom. Årsmøtet kan vedta at høgare vassavgift skal svarast for storbrukar med fleire bygningar som t.d. industrianlegg, institusjon eller gardsbruk, og lågare for t.d. naust. Ved for sein betaling kjem det til forseinkingsrente etter lovbestemt sats, purregebyr og eventuelle innkrevjingskostnader.

§7 Medlemsplikter
Medlemene pliktar å følgje vedtekter og retningsliner i føretaket. Medlemene pliktar la eit anna medlem si vassleidning vederlagsfritt bli lagt over hans/ hennar eigedom. Leidninga skal, så langt råd er, leggjast der medlemen anviser. Grøfta skal lukkast forsvarleg og på dyrka mark gjødslast og såast til. Medlemen pliktar gje lov til å grava ved lekkasjar og liknande. Medlemen pliktar skriftleg å varsla styret når han/ ho vil leggja vassleidning utanom våningshuset. Arbeidet kan ikkje starta før det er godkjent av styret. Ein medlem pliktar å halda sine private leidningar i full orden. Påviste manglar som ikkje vert retta opp, kan medføre stenging av vatnet. Medlemen pliktar utan opphald varsla Føretaket når vedkomande ikkje lenger fyller vilkåra om medlemskap i §3. Medlemskapen kan overførast direkte til ny eigar som oppfyller vilkåra utan plikt for den nye medlemen til å betala nytt medlemsinnskot. Ved utmelding uansett årsak vert det ikkje nokon tilbakebetaling av medlemsinnskotet. Beviseleg skade som ein medlem påfører føretaket eller eit annan medlem skal erstattast.

§8 Styret
Føretaket er leia av eit styre med 5 medlemer og 2 varamedlemer. Styremedlemene skal veljast av årsmøtet. Valperioden er 2 år. To eller tre av styremedlemene er på val kvart år. Styreleiar skal veljast av årsmøtet, valperioden er eitt år. Nestleiar skal veljast av årsmøtet, valperioden er eitt år. Varamedlemene skal veljast av årsmøtet, og i rekkjefølgje, dvs. 1. og 2. vara. Valperioden er to år. Styret skal leia føretaket si verksemd etter gjeldande lover, vedtekter og vedtak og utføra alle gjeremål som ikkje etter vedtektene er lagde til årsmøtet. Styret skal òg utarbeida og vedta budsjett for komande år.

§9 Dagleg leiar
Føretaket skal ikkje ha dagleg leiar.

§10 Årsmøte
Årsmøtet er Skånevik Vassverk SA sitt øvste organ. Årsmøtet skal haldast kvart år innan utgangen av mai månad. Til årsmøtet skal det liggja føre saksliste for årsmøtet, styret si årsmelding og rekneskap. Saker som medlemene ynskjer handsama på årsmøtet må vera sende til styret seinast 4 veker for årsmøtet eller seinast 1. april. Saksdokument til årsmøtet skal vera offentleggjort seinast 8 dagar for årsmøtet. Årsmøtet vert opna av styreleiar, eller den styret har peika ut. Årsmøtet skal sjølv velja møteleiar. Det ordinære årsmøtet skal handsama mellom anna desse sakene:
a) Godkjenning av innkalling og saksliste
b) Val av møteleiar og to medlemer til å underteikna årsmøteprotokolien
c) Styret si årsmelding
d) Godkjenna årsrekneskapen, herunder å disponera overskot eller inndekking av underskot og handsama styret sine forslag til avsetjingar
e) Etter framlegg fra valnemnda velja styreleiar, nestleiar, styremedlemer og varamedlemer

f) Velja medlemer til valnemnda og leiar i valnemda

g) Fastsetjing av styret si godtgjersle
h) Handsama andre saker som er nemnde i innkallinga, og etter framlegg frå styret eller ein eller fleire medlemer. Årsmøtet avgjer sakene med vanleg fleirtal av dei opptalde røystene, når ikkje noko anna er sagt i lov eller vedtekter. Ved likt røystetal har møteleiar dobbeltrøyst, bortsett frå ved personval. Personval skal vera skriftleg dersom det er forslag på fleire personar, eller det vert kravd av ein medlem.

Årsmøteprotokoll skal førast. Protokollen vert underskriven av dei to medlemene valde på årsmøtet, saman med møteleiaren.

§11 Røysterett og røystegjeving på årsmøtet

Medlemer har røysterett på årsmøtet. Sameigarar i eigedom/eigedomar skal reknast som èin medlem, slik at ein eigedom berre kan vera representert av ein person åleine ved røysting. Representant for sameige og juridiske personar må ha fullmakt. Ingen medlem har meir enn ei røyst, også om medlemen har teikna medlemskap for fleire eigedomar/einingar. Medlemer har ikkje høve til å møte med fullmektig.

§12 Ekstraordinært årsmøte
Styret kan kalla inn til ekstraordinært årsmøte. Styret kan også kalla inn til ekstraordinært årsmøte dersom rekneskapsførar/ revisor eller minst ein tidel av medlemene framset skriftleg krav om å få teke opp eitt og det same klårt oppgjevne emnet. Ekstraordinært årsmøte skal innkallast med minst 8 dagars varsel. Innkallinga skal innehalda sakspapira til dei saker som det er ynskje om å handsama. Det skal vera minst ein månad mellom ordinært og ekstraordinært årsmøte.

§13 Endring av vedtekter
Forslag til endring av vedtektene kan berre handsamast på ordinært årsmøte. For gyldig vedtak av endringar krevst 2/3-fleirtal av frammøtte røysteføre. Endringsforslag skal følgja innkallinga til årsmøtet.

§14 Tvisteløysing
Tvist mellom ein eller fleire medlemer og føretaket skal fyrst søkjast løyst ved forhandlingar. Fører slike forhandlingar ikkje fram, kan kvar av partane krevja tvisten endeleg avgjort etter reglane i Lov om voldgift av 14. mai 2004 nr. 25.

§15 Oppløysing av Skånevik Vassverk SA

Vedtak om oppløysing av føretaket vert gjort av årsmøtet, og krev 2/3-fleirtal av alle røysteføre medlemer i føretaket. Dersom ikkje 2/3 av medlemsmassen er til stades på årsmøtet skal saka handsamast på nytt i neste ordinære årsmøte. Bindande vedtak om oppløysing kan då gjerast av 2/3 av frammøtte røysteføre medlemer. Ved oppløysing har føretaket sine medlemer ikkje rett til å få utbetalt sine medlemsinnskot. Eventuell overskytande kapital eller lausøyre skal gå til drift og investering i vassforsyninga for medlemene. Etter vedtak om oppløysing skal årsmøtet velja eit avviklingsstyret som gjennomfører oppløysinga av føretaket i samsvar med oppløysingsreglane i samvirkelova.

§16 Samvirkelova sin funksjon
Den til ei kvar tid gjeldande samvirkelov skal gjelda der vedtektene ikkje seier noko anna.

============================================================

Leveringsbetingelsar vedtatt på årsmøtet 2018 under:

Leveringsbetingelsar for Skånevik Vassverk SA

1. Forutsetningar
Anlegget til andelseigar/medlem/kunde blir tilknytta vassverket sitt ledningsnett med dei rettar og plikter som samsvarar med Skånevik Vassverk SA sine vedtekter og leveringsbetingelsar.

2. Teikning av andelar
Medlemsskap startar når ein har fyllt ut og underteikna Skånevik Vassverk sitt innmeldingssskjema/ betalt tilkopling.
Andelseigar vil då motta eit eksemplar av vedtektene og leveringsbetingelsane.
Ein andelseigar må eiga fast eigedom innan vassverket sitt forsyningsområde. Vassverket har rett til å kreva identifikasjon av andelseigaren , foretaksnummer, adresse og telefonnummer.

3. Overdragelse
Overdragefse skjer dersom den faste eigedomen skiftar eigar.
Det må då fyllast ut eit nytt innmeldingsskjema / betala vassavgifta og den nye eigaren er slik blitt medlem av Skånevik Vassverk SA. Den som overdreg/sel eigedomen har plikt å melda ifrå til vassverket.
Den nye eigaren godtek med dette dei gjeldande vedtektene og leveringsbetingelsane.

4. Innstallasjon, endringar, utvidingar m.v. av anlegg
Nye innstallasjonar i bygningar og liknande blir gjort på andelseigaren/kunden sin kostnad. Desse må utførast av autorisert røyrleggjar og det må meldast ifrå til vassverket,

5. Ledningsnett
Skånevik Vassverk sitt ledningsnett er hovudledningar og fordelingsledningar. Vassverket eig og vedlikeheld desse. Andre ledningar reknast som stikkledningar og det er andelseigar/kunde som kostar og vedlikeheld desse.

6. Tilkoplingsavgift.

Tilkoplingsavgifta er fastsett av styret i vassverket og skat betalast ved tilkopling av vatnet.
Den kan også bli innkrevd før arbeidet tek til og det kan i særskilde høve krevast garanti som sikkerheit.

7. Anleggjing og vedlikehald

Vassverket vedlikeheld sine hovud og fordelingsledningar. Ved utbyggjing av nye anlegg, legg utbyggjar nye hovud-og fordelingsledningar, desse vert etter godkjenning og ferdigstilling overtekne av Skånevik Vassverk SA. Andelseigar/kunden kostar sjølv sine stikkledningar. Ledningstrasear, ledningsdimensjonar, materiell og leggjing skal godkjennast av vassverket. Andelseigar/kunde har ansvar for stikkledningen frå anboringspunkt (inkl. anboringsklemme) fram og til og med stoppekran. Arbeidet skal utførast av autorisert røyrleggjar.

8. Rett til bruk av grunn
Skånevik vassverk SA har rett til å leggja naudsynte hovud-og fordelingsledningar over andelseigar/kunden sin eigedom i ein trase som er mest hensiktsmessig. Vassverket har også rett til å nytta veier over eigedomen og skal gis rett til å utføra naudsynt arbeid med ledningsnett /kummar o.l. Dette inneber også graving dersom det er naudsynt. Arbeidet skal så langt som mogeleg gjerast på ei årstid der det gjer minst skade. Erstatning for skade på trer, gjerder, drenering, avlingstap eller anna skal så langt råd gjerast opp etter overenskomst. Dersom andelseigar/kunde og vassverket ikkje blir samde om erstatningssum skal denne avgjerast ved voldgift.

9. Forsyning av andre
Ingen andelseigar/kunde må forsyne andre eigerarar/brukerar av annan eigedom med vatn utan godkjenning frå styret i vassverket.

10. Grunneigar/festar si varslingsplikt og ansvar ved skade.
Grunneigar/festar har plikt til å varsia vassverket på førehand dersom han skal grava, fylla opp eller gjera annan endring av terrenget. Dette gjeld også dersom han skal sprengja, byggja veg eller gjera anna arbeid som kan gjera skade, eller på anna måte påverka ledningsnettet. Vassverket må varslast i god tid slik at ein kan gjera naudsynte tiltak/ gi rettleiing. Dersom det blir gjort skade på på vassverket sin eigedom kan det bli krevd erstatning. Dersom vassverket ikkje er blitt varsla på førehand vil den evt. skaden bli rekna som uaktsomhet og det vil bli krevd erstatning.

11. Flytting eller fjerning av ledningar
Dersom det på grunn av offentlege påbud eller av grunneigar sitt ynskje/behov trengs å flytta/endra eller fjerna ein stikkledning kan dette gjerast av vassverket. Kostnadane blir då på rekvirenten si rekning. Tilsvarande flytting/endring av hovudledningar og fordelingsledningar kan berre krevast i særskilde tilfelle.

12. Vassprisar

Vassavgifta blir fastsett på årsmøtet.

12.1 Det kan bli innvilga reduksjon av vassavgifta i særskilde tilfelle.
12.2 Betaling
Vassavgifta skal betalast ein gong i året.
12.3 Renter for for sein betaling.
Ved for sein betaling blir kravet sendt til inkasso og det blir rekna forsinkelserenter.

13. Stenging
13.1 Vassverket kan stenge anlegget dersom kunden ikkje betalar skyldig vassavgift. Stenging kan tidlegast skje 28 dagar etter at betalingsfristen har gått ut. Vassverket er ikkje ansvarlege for skade eller tap som kan oppstå ved rettmessig fråkobling.

13.2 Før stenging kan skje, pliktar vassverket å gi ei skriftleg melding om dette på førehand.
Der skal det koma fram :
- At kunden kan unngå stenging dersom det blir betalt skuldig vassavgift innan 14.dagar.
- Ei oppfordring om snarleg å kontakte vassverket ved betalingsproblem og liknande.
- Kostnadane ved igjenkopling etter evt.stenging.

Dersom det står om liv og helse må vassverket midlertidig utsetja stenging.

13.3 Kunden pliktar å gi vassverket adgang til anlegget og stoppekran for fysisk å utføra stenginga.
13.4 Dersom vassverket har stengt eit anlegg, må ingen andre enn vassverket åpne det igjen. Eit anlegg som er stengt p.g.a. manglande betaling blir åpna igjen etter at kunden har betalt all gjeld til vassverket, - inkludert utgiftene til stenging og åpning av anlegget.

14. Innskrenking og regulering av vatn.

Det må ikkje sløsast med vatn. Dersom det blir naudsynt kan vassverket varsla innskrenking av forbruk. Dette kan til dømes vera forbod mot vatning av hagar i periodar med tørke. Ved brann er kunden pliktig å stengja vassuttak som ikkje blir brukt til brannsløkkjing.

15. Fråkopling

Vassverket kan kopla frå eit anlegg utan nærmare varsel dersom anlegget kan volda skade eller det treng snarleg utbetring for å hindra vasstap o.l.

15.2 Vassverket kan kopla frå eit anlegg dersom det er naudsynt p.g.a. ettersyn, vedlikehald eller utvidingar av kunden sitt anlegg og/eller anleggsdeler. Vassverket må då varsla kunden på førehand. I den grad det er mogeleg skal arbeidet gjerast på tider som er minst til sjenanse for kunden.

16. Leveringshindringar - force majeure
Vassverket er fri for alt ansvar for skade og tap ved brudd på vasslevering eller innskrenkingar som skuldast forhold som ligg utanfor vassverket sin kontroll,- eller som vassverket med rimelege midlar ikkje kan hindra. Dette kan til dømes vera streik, pålagt rasjonering frå myndigheter o.l.

17. Indirekte skader og tap
Vassverket er ikkje ansvarlege for indirekte skader og tap .
Indirekte skade og tap kan til dømes vera:
- Tap som skuldast redusert eller bortfall av vasstilførsel (driftsavbrot) - Tap på kunden sine anlegg. apparat eller gjenstander som skuldast varsla spyling eller reperasjonar.

18. Endring av leveringsbetingelsane
Kunngjering om endringar av leveringsbetingelsane blir gitt i lokalpressa eller evt. som direkte melding til andelseigar/kunde. Endringar av leveringsbetingelsar skal vedtas på årsmøte og er først gjeldane 14 dagar etter at det er gjort kjendt.

19. Tvistar
Er partane samde om handsaming av konflikten i voldgift skal einkvar tvist som gjeld desse leveringsbetingelsane avgjerast ved voldgift , etter tvistemålloven kapittel 32.
Er ikkje partane samde. blir tvisten handsama av dei ordinære domstolane.

Leveringsbetingelsane er reviderte og godkjendte på Årsmøtet i Skånevik Vassverk 5. juni 2018

Styret i Skånevik Vassverk AS

Heidi Wannberg

-styreleiar-